АҞӘА, ԥхынҷкәын 27 – Sputnik. Аҟәа ақалақь аусӡбарҭа Киргизиа атәылауаҩҳәсақәа анаркотикқәа рыҭиразы ахара рыдҵаны азыӡба аднакылеит. Абри атәы аанацҳауеит Апрокуратура хада.
Киргизиа атәылауаҩҳәсақәа - Алтынаи Акбари Кызи Атыргул Тагаибекови анаркотикқәа рыҭиразы 15-15 шықәса рықәырҵеит азеиԥш режим аколониаҿы ирхыргарц, иара убасгьы 600-600 нызқьмааҭ ахараԥса аҳәынҭқарра иаларгалароуп.
Ахара здырҵо аҳәсақәа 2022 шықәса рашәарамзазы Аԥсны Аҩнуҵҟатәи аусқәа рминистрра аусзуҩцәа иааныркылеит анаркотикқәа аладырҵәоит ҳәа гәҩарас иҟаҵаны. Иаанкылаз аҳәса наҟ-наҟ анаркотикқәа раларҵәаразы 50-50 грамм иҟаз 107 еилаҳәара еиқәыршәаны ирыман. Раанкылараан аилаҳәарақәа рыхәҭак рхаҭақәа ирыдбалан, аҽа хәҭак амаӡа ҵәахырҭақәа рҿы иԥшаан.