АҞӘА, ажьырныҳәа 3 - Sputnik. Аретро-дәыӷба Тҟәаԥсынтәи Гаграҟа атуристцәа аанагалоит ажьырныҳәа 8 рҟынӡа, абри атәы аанацҳауеит Шәача ақалақь анапхгара.
Адәыӷба есыҽны ибжьазаауеит. Гагрантәи Тҟәаԥсҟа адәыӷба дықәлоит ажьырныҳәа 2-7 рзы, ажьырныҳәа 8 рзы- Гагра-Шәача ахырхарҭа мҩала.
Тҟәаԥсынтәи Гагранӡа атуристцәа хә-сааҭки 25 минуҭи рыла иааиуеит, ианыгьежьуа хә-сааҭки 40 минуҭи.
Атуристә ретро-дәыӷба раԥхьаӡа акәны ари ахырхарҭа мҩала ибжьысит 2020 шықәсазы. Адәыӷба 10 вагонк рыла ишьақәгылоуп, 386-ҩык апассаџьырцәа рҭыԥ амоуп. Авагонқәа асовет аамҭаан ишыҟаз еиԥшны иҟаҵоуп, аныҳәамшқәа рзы ахәмаргақәа рыла иҩычоуп.