АҞӘА, ажьырныҳәа 11 – Sputnik. Урыстәыла ахада Владимир Путин ашықәс аполитик ҳәа далыркааит Ауаажәларратә гәаанагара аҭҵааразы Урыстәылазегьтәи Ацентр (ВЦИОМ) имҩаԥнагаз азҵаарамҩаԥгара алҵшәақәа рыла.
Урыстәыла ахада рыбжьы ирҭеит 55% изызҵааз рахьынтәи. Иалкаахаз хҩык рыбжьара иҟоуп Михаил Мишустин - 21%, Сергеи Лавров - 13%.
Изызҵааз рыбжа -еиҭабжаҩык ирцәыуадаҩхеит ашықәс аполитик иӡбахә аҳәара, 7% ус еиԥш дыҟаӡам рҳәеит.
Аспортсменцәа рыбжьара аԥхьагылара аанылкылеит аҵаақәшьқьрааразы аолимпиатә чемпионка Камила Валиева - 7%. Лара илышьҭанеиуеит ашәаҩаныҟәаҩ Александр Большунов - 5%, ахоккеиасҩы Александр Овечкин - 4%. Иара убас 2-2% урыстәылауаа рыбжьы рырҭеит аҵаақәшьқьрааҩцәа Анна Шьербакови Александра Трусови.
Урыстәылауаа изызҵааз рахьынтәи 75% ирцәыуадаҩхеит ашықәсазтәи ашәҟәыҩҩ иалкаара. 4% изызҵааз лыхьӡ рҳәеит Захара Прилепина, 2-2% - Александр Пушкини Виктор Пелевини.
Азҵаарамҩаԥгара мҩаԥысуан ҭелла , уи иалахәын 18 шықәса ирҭысхьоу 1600-ҩык.