АҞӘА, ажьырныҳәа 20 – Sputnik, Бадри Есиава. 43 метра иҳараку анаԥшы-ааԥшырҭатә барбал аадыртуеит Афон Ҿыц 2023 шықәса ааԥын анҵәамҭаз ҳәа Sputnik акорреспондент изеиҭеиҳәеит аргылара иаҿу анаплакҩы Саид Ажәанба.
Иара иҳәеит аусурақәа ишрылагахьоу ақалақь астадион ааигәара.
"Абарбал аргылараз аҭыԥ алхра ақалақь ахадара алархәны ишьақәыргылоуп. Арантәи амшын, Ивертәии Афонҿыцтәии ашьхақәа, аберҭыԥ, ақалақь ахаҭа ибзианы иубарҭоуп", - ҳәа иҳәеит Ажәанба.
Аттракцион аҳаракыра 43 метра иҟалоит. Иазгәаҭоуп фҩык-фҩык зкуа 18 кабина. Урҭ рҟынтәи иҟалоит иҷыдоу-акабинақәагьы, уаҟа архьшәашәагақәеи арԥхагақәеи рыла еиқәыршәахоит, ӡынгьы-ԥхынгьы аус рулар алшоит. Абарбал аиҿартәашьа москватәи азауадқәа руак аҿы иҟаҵоуп.
Ажәанба иажәақәа рыла иара шәарҭам. Уи азы аҭакԥхықәра иаҵагылоит азин ҷыда змоу аргыларатә еилахәыра.
Анаплакҩы агәрагара имоуп Афонҿыц асеиԥш агәмырҿыӷьратә ҭыԥ аартра атуристтә инфраструктура аҿиареи асасцәа радыԥхьалареи рзы ицхыраагӡоуп ҳәа.