АҞӘА, ажьырныҳәа 21 – Sputnik, Бадри Есиава. Пицунда анаԥшы-ааԥшырҭатә барбал дыргылеит, аусура иалагоит аԥхынтәи аԥсшьара алагамҭаз ҳәа Sputnik акорреспондент изеиҭеиҳәеит аргылара "Gagra Palace" аилахәыра-аԥшәмацәа рхаҭарнак Андреи Ходченков.
Иара иазгәеиҭеит аттракцион шдыргылаз "Акурорт Пицунда" иахьаҵанакуа, уажәы акабинақәа рыҟны аидара ақәҵаны агәаҭаратә усура ишахысуа. Анаԥшы-ааԥшырҭатә барбал 55 метра иҳаракуп, 24 кабина амоуп кабина цыԥхьаӡа фҩык-фҩык рҭыԥқәа ыҟоуп.
"Иара гагратәи анаԥшы-ааԥшырҭатә барбал еиԥш саркьала иҟаҵахоит, архьшәашәақәа аҭахоит, иара убас пицундатәи абарбал злалкаахо кабинацыԥхьаӡа амузыка аҳәалоит. Аҭааҩ алшара иоуеит иара игәы иақәшәо амузыка дазыӡырҩуа абарбал ақәтәара", - ҳәа иҳәеит Ходченков.
Иара убасгьы иазгәеиҭеит, абарбал хыхьынтәи амшын ухԥшыло ашьхақәагь шубарҭоу.
Ходченков иажәақәа рыла, агәаҭаратә усурақәа ианрылгалак иазгәаҭоуп анаԥшы-ааԥшырҭатә барбал ақәгәыӷраз Урыстәылатәи асертификатратә центр ахысра. Абарбал аибаркыра ҟаҵоуп москватәи азауадқәа руак аҿы.
Андреи Ходченков иҳәеит аилахәыра аԥхьаҟа ас еиԥш иҟоу абарбал Аҟәа аргылара азгәаҭан ишамоу. Иазгәеиҭеит, ԥырхага рмоур иааиуа ашықәс азын ишыргылахо.