АҞӘА, ажьырныҳәа 22 - Sputnik. Аԥсны Аҳәынҭавтоинспекциа аусзуҩцәа ажьырныҳәа 21 рзы иаадырԥшит 512 административтә зинеилагара, убри ахыԥхьаӡараҿы 72-ҩык ижәны аԥсҟы зкыз аадырԥшит.
Даҽа 49 ԥкаанҵа шьақәыргылан автомашьынақәа рԥенџьырқәа ахьеиқәаҵәацәаз азы.
"72-ҩык ижәны аԥсҟы зкыз амашьынарныҟәцаҩцәа зегьы рмашьынақәа рныҟәцаразы азин рымхын, рганахьала административтә шьаусҭҵаара хацыркуп", - ҳәа ануп ААР апресс-маҵзура адырраҭараҿы.
Аҳәынҭавтоинспекциа аиҳабы Баҭал Агрба асабша ажьырныҳәа 21 рзы адырра ҟаиҵеит Аԥсны Аҳәынҭавтоинспекциа еиҳа рҽырӷәӷәаны аус рулоит ҳәа. Иҷыдоу аппарат, иҷыдоу арота, СОБР аплан "Ишәарҭадоу араион" аус азыруан.
Уи зыдҳәалоу асабша ачарақәа ахьымҩаԥырго ауп, избанзар аӡәырҩы аԥсҟы ркуеит арыжәтә ыжәны.