АҞӘА, ажьырныҳәа 24 – Sputnik. Абас-гитарарҳәаҩ Антон Давидианци авокалистка Лаура Водианицкаиеи Аҟәа аҟазаратә-класс мҩаԥыргоит ҳәа аанацҳауеит Акультура аминистрра.
Амузыка аурокқәа мҩаԥгахоит жәабран 7 асааҭ 12:00 рзы Самсон Ҷанба ихьӡ зху аԥсуа драматә театр аҿы.
Изҭаху зегьы алахәхар рылшоит. Уи азы ужәла, ухьӡ, уабхьӡ арбаны ашәҟәы наушьҭроуп абри аелектронтә ԥошьҭахь: pressinfo_mincult@mail.ru - атема "Мастер-класс".
Антон Давидианц – атехникатә ҩаӡара ҳарак змоу урыстәылатәи абас-гитарарҳәаҩуп. Аус рыциуан Игор Бутман, Даниил Крамер, Сергеи Манукиан, Алексеи Козлов, Леонид Агутин, Николаи Носков, агәыԥ "Би-2", ашәаҳәаҩ Иолка.
Лаура Водианицкаиа – џьаз шәаҳәаҩуп, жәларбжьаратәи аицлабрақәа дырлауреатуп, афестивальқәа дырлахәылоуп, Москватәи акультура аинститут аестрада-џьаз шәаҳәара акафедра аиҳабы дихаҭыԥуаҩуп.