АҞӘА, ажьырныҳәа 25 - Sputnik. Дранда инхо Гурам Какоба закәаншьаҭада ихысуа абџьари аџьаԥҳани раахәара, рымазаараз, рныҟәгара иара убасгьы анаркотикқәа рымазаараз гәҩарас дрымоуп. Абри атәы аанацҳауеит Аԥсны ААР апресс-маҵзура.
Какоба Гәылрыԥшьтәи Аҩнуҵҟатәи аусқәа араионтә ҟәша аусзуҩцәа аоперинформациа анагӡараан дааныркылеит.
Имашьынаҿы ирбеит 10 граммк аканнабис. Ашьҭахьтәи атәарҭаҿ иҭаз ашәыраҿ ирбеит апатронақәа ԥшьба зцыз атапанча.
Аусҭҵаара мҩаԥысуеит. Гурам Какоба аҩнтәы рбаандаҩра даҵаркуп.