АҞӘА, ажьырныҳәа 27 – Sputnik, Сариа Кәарцхьиаԥҳа. Раԥхьатәи аԥсыӡкразы Очамчыра араион ачемпионат "Кәыдры аӡиас" аатит ажьырныҳәа 27 рзы, абри атәы Sputnik акорреспондент илзеиҭеиҳәеит Аԥсны аԥсыӡкреи ашәарыцареи рыспортхкы афедерациа ахада Альберт Бондаренко.
Аицлабра иалахәуп Аԥсни, ДЖәР-и, Урыстәылеи, Уаԥстәылеи рҟынтәи 12 команда. Командацыԥхьаӡа хҩык-хҩык алахәуп. Бондаренко иажәақәа рыла, иаарту аӡиас аҿықә ахькьаҿу иахҟьаны алахәылацәа рхыԥхьаӡара ԥкуп.
"Ачемпионат ахьымҩаԥаҳго аҭыԥ анаҩс бнароуп. Ачемпионат азы абнара ахшьаара ҳаламгеит. Уи иахҟьаны 36-ҩык роуп иалахәу", - иҳәеит Бондаренко.
Ажьырныҳәа 27 ашьыжь Кәыдры аӡиас иҭарҵеит 1400 кьыла амлагәыр, ажьырныҳәа 28 рзы даҽа 800 кьыла аԥсыӡ аушьҭхоит. Бондаренко иажәақәа рыла, ари аԥсыӡ хкы Аԥснытәи аӡиасқәа еиҳа ирнаалоит.
Бонадренко ишазгәеиҭаз ала, аицлабра аԥҟара хадақәа иреиуоуп-аԥсабара ԥырхага амҭара. Ачемпионат "иукит-иоуушьҭит" аԥҟара иқәныҟәоит.
Аԥсыӡкразы ачемпионат хыркәшахоит ажьырныҳәа 29 рзы.