АҞӘА, жәабран 2 – Sputnik. "Аӡыршьҭра" аӡҭгагатә станциақәа алашара арцәара аихшанҵа инақәыршәаны иаанаҳкылоит, Гәымсҭа иҟоу аӡеизакырҭақәа аҭәра иахьӡаӡом ҳәа еиҭеиҳәеит "Аӡыршьҭра" анџьныр хада Мераб Анқәаб арадио Sputnik аинтервиу аҭо.
"Аҩнеихагылақәа рҿы аӡы халаларц азы аӡҭгагақәа х-сааҭк еиҵамкәа аус руроуп. Уи адагьы афымцамчхара анормақәа анынамӡо ыҟоуп. 10 киловольт ахьаҭаху 8,8 ма 9 киловольт аныҟоу ыҟоуп, ари Гәымсҭа игылоу аӡҭгага ҿыцқәа рзы иазхаӡом", - ҳәа иҳәеит Анқәаб.
Иара убасгьы иҳәеит АУН "Амшынеиқәафымцамч" алархәны аиҿцәажәарақәа шцо "Аӡыршьҭра" лашарала еиԥымҟьартә аҟаҵаразы.