АҞӘА, жәабран 3 - Sputnik. Марат Касем идукат аҳәамҭа ҟаиҵеит уи абахҭа дахьҭаркыз изаԥырҵаз аҭагылазаашьа Аргәаҟрақәа раԥырҟәҟәааразы аконвенциа амчра иаҵанакуеит ҳәа. Абри атәы аҩуеит а-Telegram-канал Sputnik Ближнее зарубежье.
"Ажьырныҳәа 30 рзы Касем ҵаҵӷәык ыҟаӡамкәа диаргеит зус рыӡбахьоу абаандаҩцәа ахьҭаку ахыбрахь, дагьҭаркит аӡә имацара дахьҭаркуа акамера. Агәами амаҵеи хәдацәахьы дахьрылатәоу иахҟьаны Касем аллергиа изцәырҵит", - ҳәа ануп анҵамҭаҿы.
Адукат идыррақәа рыла, Касем аҳауа ахьизымхо азы икамера аԥенџьыр аартра иқәшәоит, убри иахҟьаны ахылԥа ихаҵаны, хыхьтәи имаҭәа ишәҵаны ацәара иқәшәоит.
Уи адагьы, ихроникатә чымазарақәа еиҭацәырҵит - аподагра иахҟьаны ишьацәкьарақәа аус рызируӡом.
Адукат иазгәеиҭоит ажурналист ихьаақәа аӡәгьы хьаас ишрымам, ашә данасуа аҭак шыҟарымҵо, идукат аҭел дизасырц азин ширҭаз ахымш раан заҵәык, ианиҭаххалак асра азин шимоугьы.
Абахҭаҿ иҟоу аҳақьым Касем ихьаақәеи идиагнози хырҩа аҭаны аллергиаҟынтә хәшәы башақәак ииҭеит.
Адукат иажәақәа рыла, Марат игәабзиара даара иуашәшәыроуп.