АҞӘА, жәабран 6 - Sputnik. Ҭырқәтәыла аҵара зҵо аԥсуа студентцәа адгьылҵысраан ԥырхага рмоуӡеит, абри атәы арадио Sputnik аефир аҟны еиҭеиҳәеит Ҭырқәтәылатәи Ареспубликаҿы иҟоу Аԥсны азинмчнагӡа змоу ахаҭарнак Ибраҳим Аҩӡба.
"Астудентцәа аӡәгьы ааха имоуӡеит, урҭ Стамбул азааигәара ауп иахьыҟоу, дара рзы шәарҭара ыҟам, рҵара иацырҵоит. Ахыбрақәа реилаҳара ишаҿыц иаҿуп", - иҳәеит иара.
Аҩӡба иажәақәа рыла, адгьылҵысраан ԥсыуа ԥҳәыск лыԥсҭазаара далҵит, аԥсуа диаспора ахаҭарнакцәа ааҩык аахақәа роуит. Адыгаа 12-ҩык ҭахеит, 28-ҩык ааха роуит, жәаҩык акыр иӷәӷәоуп.