АҞӘА, жәабран 10 - Sputnik, Сариа Кәарцхьиаԥҳа. Дырмит Гәлиа иҩны-музеи ахь ихынҳәит Пабло Пикассо иџьам. Абри атәы Sputnik акорреспондент илзеиҭалҳәеит амузеи адиректор Светлана Қорсаиаԥҳа.
“Дырмит Гәлиа иҩны-музеи ахь ихынҳәит Пабло Пикассо иџьам. Ҳара официалла аџьам Амилаҭтә Банк ахь аҵәахразы ираҳҭеит. Аҵәахраз аиқәшаҳаҭра аиҭакрақәа алагалоуп. Уажәшьҭарнахыс аџьам Абанк аҵәахырҭа аҭыгара ҟалоит Акультура аминистр, Амузеи адиректор, Амузеи ахьчаҩ хада алархәны, даҽакала иуҳәозар, аӡәы имацара алакьысра азин имам. Ари ауп ихадароу", - лҳәеит Қорсаиаԥҳа.
Пикассо иџьами франциатәи аскульптор Фернан Леже иусумҭақәа ҩбеи Дырмит Гәлиа ихьӡ зху алитература-мемориалтә музеи ҳамҭас иеиҭеит асоветтә шәҟәыҩҩы Константин Симонов.
Арҭ хәызмоу аҳамҭақәа ыӡит ҳәа аинформациа цәырҵит 2022 шықәса абҵарамзазы.
Амузеи адиректор Светлана Қорсаиа лажәақәа рыла, 2021 шықәса жәабран 25 рзы артефактқәа абанк аҵәахырҭаҿ ишыҟамыз еилкаахеит, урҭ амузеи анапхгара ирмазҵаакәа уаанӡатәи акультура аминистр Гәдиса Агрба иҭан. Уи аахыс дара рхабар еилкаамызт. Адырра ҟаҵан Ашәарҭадаратә маҵзурахьы, избанзар урҭ алахәны ауп амузеи анапхгара арҭ амаҭәарқәа аҵәахрахь ишнаргаз.
Аусбарҭа аҭҵаарақәа ирылагеит. Пабло Пикассо иҩычеит ҳәа агәызҩара ыҟоу аџьам 2022 шықәса алагамҭаз Москваҟа аекспертизахь ишьҭын ҳәа иҳәеит акультура аминистр Даур Ақаҩба аиҳабыра реилатәараҟны. Аха Қорсаиа ишазгәалҭо ала, аекспонат аекспертиза иахыжьым, аҵәахырҭа изҭыргазгьы еилкаам.