АҞӘА, жәабран 11 – Sputnik. Лыԥсҭазаара далҵит Аԥсны аҭҵаарадыррақәа ракадемиа академик, амедицинатә ҭҵаарадыррақәа рдоктор, апрофессор Зинаида Шевцова. Абри атәы аанацҳауеит ААУ аинформациеи амедиакоммуникациақәеи рыҟәша.
"Аԥснытәи аҳәынҭқарратә университет апрофессортә-рҵаҩратә еилазаареи астудентцәеи гәылсра дула лыуацәеи лҭынхацәеи ирыдышшылоит зыԥсҭазаара иалҵыз академик, амедицинатә ҭҵаарадыррақәа рдоктор, апрофессор, аџьа аветеран, "Ахьӡ-аԥша" ахԥатәи аҩаӡара занашьоу, аԥышәаратә биологиеи амедицинеи ркафедра уаанӡатәи аиҳабы Зинаида Всеволод-иԥҳа Шевцова", - аҳәоит адырраҭараҟны.
Зинаида Шевцова Аԥсны аҭҵаарадыррақәа Ракадемиа ИЕПиТ аҭҵарадырратә усзуҩын. Аҵарауаҩ хырхарҭа хаданы илыман ауаҩи амаамыни рцәа иалоу авирустә инфекциақәа рыҭҵаара. Лара лоуп раԥхьаӡа зусумҭақәа рҿы еиҭазҳәаз абарҭ амаамынқәа рчымазарақәа: агеморрагиатә шыӡ, гепатит А, аенцефаломиокардит.
1998 шықәса инаркны 2016 шықәсанӡа Зинаида Шевцова напхгара алҭон ААУ аԥышәаратә биологиеи амедицинеи ркафедра, 2011 шықәса инаркны- рҵаҩыс дыҟан.
Зинаида Шевцова 160 ҭҵаарадырратә кьыԥхьымҭеи арҵагатә цхыраагӡақәа ҩбеи дравторын.