Аԥсуа драматә театр аҿы Достоевски ироман "Бедные люди" ала Владимир Симановски ипиеса иалху аспектакль ҿыц "Агәхыхҩы" ("Ловелас") аҽазыҟаҵарақәа рхыркәшарахь инеиуеит. Аспектакль афырхаҵа хада ироль назыгӡо Аԥсны Зҽаԥсазтәыз артист Ҭеимраз Чамагәуа арадио Sputnik аефир аҟны еиҭеиҳәеит уи аус шыдыруло, ахәаԥшҩы изнаргарц ирҭаху атәы.
Чамагәуа иҳәеит Адгәыр Ақаҩба иқәиргыло аспектакль аҟны ԥшьҩык актиорцәа шалаху, урҭ ҩба-хԥа роль шынарыгӡо.
"Уанактиорха зегьы ухәмарроуп. Аус ицура даара иманшәалоуп (арежиссиор Адгәыр Ақаҩба изы-азгәаҭа), ииҭаху уеиҳәоит, нас ухы уақәиҭитәуеит. Уи ашьҭахь уара акыр узыӡбозар ухаҿсахьа акәшамыкәша, иҟауҵалак уақәиҭуп, имцху нас иара иамихуеит. Абас ҳаилибакааны ҳаҿуп. Аҿар иҳаҵагылоу Алиас Аҟалӷьба, Леон Куроглы рҽырԥсахуеит, даара разнеишьа дақәшәаны (арежиссер -азгәаҭа), рҵаҩык иаҳасабала рықәшәамшәа ҳәаны, рыԥсабара даԥырхагымкәа дааиуеит. Уи зегьы ахәаԥшҩы ахәшьара аиҭоит, ирыдыркыло-ирыдрымкыло ҳбап нас. Макьана ҳазлаҿу ала иаабац акәымкәа, даҽа бызшәак ала дагәылаԥшит апиеса. Убас иазнеип ҳәа сгәы иаанагоит ахәаԥшцәагьы…Ахәаԥшҩыи ҳареи ҳаилибакааны, ҳхьаа, ҳгәырӷьара дара рахь ииасуа иҟалап ҳәа сгәы иаанагоит", - иҳәеит Чамагәуа.
Аԥсуа драмтә театр аспектакль ҿыц "Агәхыхҩы" ахәаԥшцәа ирыднагалоит жәабран 15-16 рзы.
Аицәажәара инеиҵыхны ишәаҳар шәылшоит аудиофаил аҟны хыхь.