АҞӘА, жәабран 16 - Sputnik. Аҟәатәи ақалақьтә ӡбарҭа аҩнытә рбаандаҩра даҵанаркит акьыбачымазаразы Амилаҭтә центр аҳасабеилыргаҩ хада Антон Пархоменко. Абри атәы аанацҳауеит аӡбарҭа асаит.
Пархоменко аҩны дыздәылымҵуа дырбаандаҩхоит мызки 27 мши. Иара АА АЗ ахәҭаҷ 157 ахәҭақәа 3, 4 иазԥхьагәарҭо ацәгьа иуит ҳәа агәызҩара ыҟоуп (амаҵзуратә ҭагылазаашьа ахархәарала хыԥхьаӡара рацәала аԥара атәтәра ма аныхра, иара убасгьы асеиԥш аумҭа гәыԥҩык ианыҟарҵо).
Иара убасгьы абри аус иаҵанакуеит ацентр аҳақьым хада Лев Аргәын, ҽынлатәи астационар аиҳабы Нелли Лагәлааԥҳа, ахимиотерапиа аҟәша амедиаҳәшьа еиҳабы Лариса Кәакәасқьырԥҳа. Лев Аргәын иара убасгьы амаҵзуратә ус еиқәирҽаҽеит ҳәа агәызҩара ыҟоуп, Нелли Лагәлааԥҳа – ацәгьоура дацхрааит ҳәа.