АҞӘА, жәабран 18 – Sputnik. Аԥснытәи аҳәынҭқарратә университет атуризми асасааирҭеи русхк азы азыҟаҵаратә центр аҿы аҽазыҟаҵарақәа атеориатәии апрактикатәии хәҭақәа рыла ишьақәыргылоуп ҳәа арадио Sputnik иазеиҭалҳәеит Ацентр адиректор Кристина Лакрԥҳа.
"Иахьа аекскурсиамҩаԥгаҩ -ҳҳәынҭқарра дахаҿуп. Раԥхьаӡакәны ҳтәыла иаҭаауа атуристцәа аекскурсиамҩаԥгаҩ иоуп раԥхьа ирԥыло, уи ихаҿра, иҟазара рыла Аԥсны ахә ршьоит", - лҳәеит лара.
Лакрԥҳа лажәақәа рыла, Ацентр иазнархиоит аекскурсиамҩаԥгаҩцәа, аметодистцәа, аинструкторцәа.
Акурсқәа ирзоужьуп 298 ҵаратә сааҭ. Атеориатә хәҭахьы иаҵанакуеит аҭоурых, агеографиа, аетнографиа, аметодикатә хәҭахьы –аметодикатә усура, заатәи амедицинатә цхыраара.
Аԥышәара аизырҳараан аекскурсиатә маршрутқәа -Риҵа, Афон Ҿыц, Мрагыларатәи Аԥсны, Аҟәа) ирхысуеит, рхала апрограммақәа шьақәдыргылоит.
Адиректор лажәақәа рыла алшара ыҟоуп аҟазара аизырҳаразы ААУ аҟны. Уи апрограмма 72 сааҭ азоужьуп. Лакрԥҳа илҳәоит здыррақәа ирыцызҵар зҭаху рхыԥхьаӡара есышықәса ишацло.