АҞӘА, жәабран 20 – Sputnik, Бадри Есиава. Бзыԥ аӡышьҭра шьақәгылеит асыԥса анлеи ашьҭахь ҳәа Sputnik иазеиеҭиҳәеит Риҵатәи амилаҭ парк адиректор Адамыр Багаҭелиа.
"Анцәа иџьшьаны аӡы ахала ацарҭа аԥшааит. Ҳацәшәон аӡы рацәаны ихыҵуеит ҳәа, аха ус иҟамлеит" - иҳәеит иара.
Багаҭелиа иҳәеит аӡы ахыҵра ишахьымӡаз.
Риҵатәи амилаҭ парк аҿы асыԥсақәа ҩыџьара илеит. Асыԥсақәа руак Аӡиаҵәа ааигәара илеины аӡышьҭра акит, егьи Риҵаҟа ухазгало амҩа 26-тәи акилометр аҿы.
Апарк ахь аӡынтәи агьежьхарԥа зҵам амашьынақәа рҭалара ааныркылеит жәабран 13 рзы, Риҵатәи амилаҭ реликттә парк аҭааҩцәа рзы иадыркит жәабран 19, 20 рзы, асыԥсалеира иацәшәаны.