АҞӘА, жәабран 23 - Sputnik, Бадраҟ Аҩӡба. Аԥсны Жәлар Реизара адепутатцәа Ахылаԥшратә палата ахантәаҩ ҿыц далрымхит.
Маӡалатәи абжьыҭараан Баҭала Аиба изы рыбжьы ирҭеит 17 депутат, иҿагылан рыбжьы арҭеит – 14 депутат. Асҭамыра Аргәын изы рыбжьы ирҭеит 14 депутат, иҿагылан рыбжьы арҭеит – 17 депутат.
Аилатәараан адепутатцәа Роланд Папба Ахылаԥшратә палата аудиторс далырхит.
Абиуџьети, акредиттә еиҿкаарақәеи, ашәахтәқәеи, афинансқәеи рзы апарламенттә еилакы жәабран 13 азтәи реилатәараан Апалата ахантәаҩ изы иқәыргылаз акандидатурақәа ирыхәаԥшит. Аӡбра рыдыркылеит Жәлар Реизара асессиаҟны иахәаԥшырц.
Аԥсны азакәанԥҵара инақәыршәаны Апалата ахантәаҩа дарҭоит, ма дамырхуеит Апарламент адепутатцәа. Иара изинмчра аҿҳәара хәышықәса ҳәа ишьақәыргылоуп. Хаҿык азин имам ҩ-ҿҳәарак инареиҳаны ари аҭыԥ аанкылара.