АҞӘА, жәабран 28 - Sputnik. Аҟәеи Мински Аԥснытәи аҩқәа Беларуссиаҟа рнагара иалагарц азы еилацәажәоит ҳәа иҳәеит ателеканал "Россия 24" аефир аҿы Адәныҟатәи аусқәа рминистр Инал Арӡынба.
Аминистр иазгәеиҭеит абри азы аиқәшаҳаҭрақәа анапрыҵаҩра шымҩаԥысуа.
"Аԥснытәи аган аҟынтә егьырҭ атауартә позициақәагьы ирылацәажәоуп. Убри аан беларуссиатәи атауарқәа – ахшаалыҵ аиԥш иҟоуи егьырҭи Аԥсныҟа иаагахалоит", - иҳәеит Арӡынба.
Иара убасгьы иҳәеит атуристтә проектқәагьы реицымҩаԥгара ишалацәажәо.
Аԥсны ахада Аслан Бжьаниа жәабран 20 рзы Белоруссиа даҭааит, уаҟа Александр Лукашенко диԥылеит. Аҩтәылак рхадацәа алацәажәеит ҩ-ганктәи аусеицура азҵаара.
Белоруссиа ахада Александр Лукашенко иҳәеит Минск еснагь Аԥсны аус ацура аинтерес шамаз, Аслан Бжьаниа аиԥылара аихшьаала ҟаҵо Аԥсны жәлар белоруссиаа гәакьацәақәак реиԥш ирзыҟоуп иҳәеит.