АҞӘА, хәажәкыра 3 - Sputnik. "Адипломатиатә маҵзуразы" азакәан апроект ахәаԥшразы Апарламент ахь инашьҭуп ҳәа иҳәеит Аԥсны ААР ахада Инал Арӡынба.
Иара иажәақәа рыла, азакәан аус адулоуп Адәныҟатәи аусқәа рминистрреи Урыстәыла иҟоу Аԥсны Ацҳаражәҳәарҭеи русеицурала.
Апроект иазԥхьагәанаҭоит:
Аԥсны ААР анҭыҵтәи аусбарҭақәа русзуҩцәа еилаӡарыла русура;
Ацҳаражәҳәаҩ жәашықәса еиҳамкәа имаҵзура аҿҳәара аҭара;
ишьақәыргылахоит Аԥсны ААР анҭыҵтәи аусбарҭақәа русзуҩцәа рышықәсԥкра (55 ма 60 шықәса);
лаҵара 17 - Адипломатиатә усзуҩ имш.
"Есышықәса аусзуҩ-цыԥхьаӡа русура аилаӡара аҿҳәара иацҵахоит ма иаанкылахоит, аха ихадароуп лыҵшәа бзиала русура. Иҟан аамҭақәа ауаа шықәсырацәала лыҵшәада Ацҳаражәҳәарҭаҿы аус аныруаз, аха урҭ аамҭақәа ииасит. Уажәшьҭарнахыс ари аҭагылазаашьа еиҭакхоит", - иҳәеит Инал Арӡынба.