АҞӘА, хәажәкыра 3 – Sputnik, Бадраҟ Аҩӡба. Аҳәынҭқарратә аҳазалхартә еилакы 2022 шықәсазтәи аусура арбагақәа џьашьатәуп ҳәа иҳәеит аколлегиа аилатәараҟны афинансқәа рминистр Владимир Делба.
"Аҽа зныкгьы Аԥсны аиҳабыра ргәаанагаара атәы сҳәоит. Аилак аусура аизҳара амоуп. Асеиԥш аекономикатә рбагақәа рылыршара уадаҩуп аҳазалхартә шәахтәхҵәахақәа реиҭакрада, аха уи шәара ишәылшәыршеит. Даара ишьахәуп", - иҳәеит иара.
2022 шықәсазы Аԥсны адәныҟатәи ахәаахәҭратә еикәыршара 39,9 миллиард мааҭ артәеит. Уи 2021 шықәса иаҿурԥшуазар 11,2% рыла еиҳауп. 2022 шықәсазтәи аус нагӡоуп 117% рыла.
2022 шықәсазы аекспорт 6 миллиардки 963 миллион мааҭ итәеит. Уи 2021 шықәса иаҿырԥшны 903 миллион мааҭ ма 14,9% иҟоуп. 2022 шықәсазы аимпорт 32 миллиарди 968 миллион мааҭ итәеит. Уи 2021 шықәса иаҿырԥшны 3 миллиардки 104 миллион мааҭ ма 10,4% ыҟоуп.