АҞӘА, хәажәкыра 5 - Sputnik. Урыстәыла атәылахьчара аминистр Сергеи Шоигу аоперациа ҷыда архәҭақәа рыдҵаҟаҵаҩцәа алархәны аилацәажәара мҩаԥигеит. Абри атәы аанацҳауеит Урыстәыла Атәылахьчара аминистрра.
Атәылахьчара аминистр дырзыӡырҩит аоперациа ҷыда амҩаԥысшьа зеиԥшроуи наҟ-наҟтәи ашьаҿақәеи ирызку ажәахәқәа.
Аилацәажәараан аминистр инаҵшьны иазгәеиҭеит ишахәҭоу адәны иҟоу архәҭақәа ршәарҭадара аиҿкаара, ирҭаху зегь рыла реиқәыршәара, еиҳара амедицинатәи атылтәи ҟәшақәа.
Аганақәа иара убас иалацәажәеит арезервтә ҟәшақәа разыҟаҵара, арра-политикатә усура амҩаԥгара, ганрацәала архәҭақәа ацхыраара рыҭара азҵаарақәа.