Аԥсны жәлар Рџьынџьтәылатә еибашьраҟны Аиааира 30 шықәса ахыҵра иазку зметр кьаҿуи адокументалтәи фильмқәа реицлабра алахәхаразы арзаҳалқәеи ахҳәаақәеи рыдкылара хыркәшоуп. Аусумҭақәа рыҩаӡара зеиԥшроу, насгьы раԥхьаӡакәны ари ахырхарҭаҿы зхы ԥызшәо ыҟоу иҟаму - абри атәы арадио Sputnik иазеиҭеиҳәеит Аԥсны Жәлар рартист, акинорежиссиор Виачеслав Аблоҭиа.
Аицлабра аӡбаҩ иажәақәа рыла, иаашьҭыз 17 фильм рахьынтә иалхуп ааба. Ԥшьба документалтә фильмқәоуп, ԥшьба – сахьаркыратәқәоуп. Урҭ рахьынтә анаҩс иаанхоит х-фильмк.
"Уажәшьҭа афильмқәа равторцәа ҳрыԥхьан аиҿцәажәара мҩаԥаагоит, азҵаарақәа иҳамоу рҭак ҳаҳарцаз. Аӡбаҩцәа ҳабжьара аусумҭақәа ралхраан аилибамкаара ҳәа акгьы ҳабжьамызт. Ҩ-фильмк иаразнак иаԥсоуп ҳәа азыԥхьаӡан", - ҳәа еиҭеиҳәеит Аблоҭиа.
Иаҳа инарҭбааны аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.