АҞӘА, хәажәкыра 10 - Sputnik. Аԥсни Аахыҵ Уаԥстәылеи рыдәныҟаполитикатә усбарҭақәа рхадацәа Инал Арӡынбеи Асхар Џьиоеви ҭелла реицәажәараан ҩ-ганктәи аусеицура иалацәажәеит ҳәа аанацҳауеит Sputnik Аахыҵ Уаԥстәыла.
Аԥсни Аахыҵ Уаԥстәылеи рыдәныҟаполитикатә усбарҭақәа рхадацәа ргәаанагарақәа еиқәшәоит иахьазы Қырҭтәыла имҩаԥысуа ахҭысқәа ишрышьклаԥштәу азы, Аԥсни Аахыҵ Уаԥстәылеи ршәарҭадара аиҿкааразы рхымҩаԥгашьақәа еиуаршәаны ишрызнеитәу азы.
Убри аан иазгәарҭеит Урыстәыла Аахыҵ Кавказ арегион ашәарҭадаразы хәдықәҵа ҳасабла инанагӡо ароль.