АҞӘА, хәажәкыра 14 – Sputnik, Бадраҟ Аҩӡба. Аҟәатәи 10-тәи ашкол аҿы IT-класс аадыртраны иҟоуп ҳәа Sputnik иазеиҭалҳәеит аҵараиурҭа адиректор Аида Кәарҷелиаԥҳа.
Акомпиутертә технологиақәа раамҭазы IT-класс аартра аҵк ду амоуп лҳәеит лара, иагьазгәалҭеит асеиԥш иҟоу аклассқәа ареспублика ашколқәа жәпакы ишрымоу.
" IT-классқәа аартуп Аҟәатәи 1-тәи ашколи Тамшьтәи ашколи рыҟны. Ҳара ҳхала IT-класс аартра ҳалшо ҳаҟамызт азы Адәныҟатәи аусқәа римнистр Инал Арӡынба ацхыраара ҳаиҭеит. Ари иара иаԥшьгамҭоуп. Иара ҳашкол дахьоушьҭымҭоу азы еснагь дазҿлымҳауп. Уаанӡагьы иаҳзааихәахьан акомпиутерқәа, аинтерактивтә классӷәқәа, алингафонтә класс", – лҳәеит адиректор.
Лара лажәақәа рыла, иааизакны иҟаҵоу ацхыраара миллион мааҭ рҟынӡа инаӡоит. IT-класс аартхоит иахәҭоу ахархәагақәа анаархәалак, арҽеиратә усурақәа ианрылгалак.