АҞӘА, хәажәкыра 14 – Sputnik. Раждена Гәымба ихьӡ зху Аԥснытәи аҳәынҭқарратә филармониаҟны имҩаԥысит Аднан Шахбулатов ихьӡ зху Чечентәылатәи аҳәынҭқарратә филармониа аҟазацәа рконцерт.
Ачечен жәлар рмелодиақәа нарыгӡеит амилаҭтә инструменталтә аоркестр, ашәақәа рҳәеит аестрада ахаҭарнакцәа.
Иқәгылоз артистцәа ирзыҟаҵаз адкылараз ҭабуп ҳәа ахҳәаауа иазгәарҭеит, Аԥсны ҩаԥхьа изныкымкәан аҭаараз агәазыҳәара шроуз. Ашәаҳәаҩ Аина Исаева илҳәеит аԥхын аара азгәаҭан ишлымоу.
Аконцерт анхыркәшаха ахәаԥшцәа акыраамҭа рнапеинҟьабжьқәа еихсыӷьуамызт, иара убас Чечентәылатәи асасцәа ашәҭ шьыҵәрақәа рырҭеит.
Чечентәыла акультура амшқәа Аԥсны имҩаԥысуеит хәажәкыра 17 рҟынӡа. Акультура амшқәа хыркәшахоит Аԥснытәи аҳәынҭқарратә филармониаҟны Чечентәыла Жәлар рышәаҳәареи рыкәашареи рҳәынҭқарратә ансамбль "Ваинах" имҩаԥнаго аконцерт ала. Аусмҩаԥгатәқәа зегьы мҩаԥысуеит хәыдаԥсада.