АҞӘА, хәажәкыра 15 – Sputnik. Акомедиа "Ахаҵа ԥшӡа" аԥхьарбара мҩаԥгахоит Фазиль Искандер ихьӡ зху Аурыс драматә театр аҿы хәажәкыра 26 рзы ҳәа аанацҳауеит атеатр асаит.
2022 шықәсазы урыстәылатәи арежиссиорцәа РУСДРАМ алабораториаҿ ицәырыргеит Александр Островски ипиесақәа ирылхыз аескизқәа хԥа.
Ахәаԥшцәа рыӡбарала аиааира агеит Новосибирсктәи аҳәынҭқарратә театртә институт аушьҭымҭа Ирина Дремова лусумҭа.
Ахаҵа ԥшӡа – Аполлон Окоемов ироль дыхәмаруеит Осман Абыхәба, аԥҳәыс лроль хада – Аманда Кәарацхьелиаԥҳа (Зоиа Окоемова).
Арежиссиор лажәақәа рыла, арольқәа реихшараан иаразнак иубарҭан изҭатәыз.
"Апиеса "Ахаҵа ԥшӡа", хымԥада, Аԥсны ишанаало аиԥш ҽаџьара ишанымаалоз еилыскааит. Ахацәа ара ҽакала иҟоуп сызҳәом, аха аҭыԥантәи аменталитет ухнахуеит, иҭуҵаар уҭаххоит", - ҳәа лҳәеит лара.
Аспектакль иалахәуп РУСДРАМ актиорцәа: Анна Гиурегиан, Џьамбул Жорданиа, Наталиа Папасқьырԥҳа, Емиль Петров, Марина Скворцова, Милана Ломиаԥҳа, Лиупчо Спасов, Кирилл Шишкин, Екатерина Барышева. Аспектакль ддырбоит хәажәкыра 26, 27 асааҭ 19:00 рзы.