АҞӘА, хәажәкыра 16 – Sputnik. Атуристтә ретро-дәыӷба "Шәача" Гаграҟа аара иалагоит мшаԥы 29 инаркны жьҭаарамза анҵәамҭанӡа ҳәа аанацҳауеит Урыстәыла аихамҩа асаит.
Адәыӷба ахырхарҭа мҩа шыҟаз иаанхеит. Аҩаша ада есыҽны Тҟәаԥсынтә идәықәлоит асааҭ 04:20 рзы, Гагра инеиуеит асааҭ 09:45рзы. Ианааиуа аҽныҵәҟьа ихынҳәны Тҟәаԥсҟа идәықәлоит асааҭ 19:25 рзы, Тҟәаԥс инеиуеит 01:05 рзы. Хашалы адәыӷба Шәачатәи авокзал аҟынтәи иқәҵуеит.
Гагратәи ааҭгыларҭахь иааилоит асааҭ 11:35 рзы, Гагрантәи иқәҵлоит асааҭ 18:50 рзы.
Сынтәа адәыӷба аамҭеихша аҽаԥсахит, Гаграҟа иааиуеит еиҳа изааны, иагьықәҵуеит еиҳа ихьшәаны, уи инадҳәаланы атуристцәа еиҳа аамҭа роуеит Аԥсны аԥшӡарақәа рбаразы.
Иара убасгьы аԥсуа-аурыс ҳәааҿы агылара аамҭа ркьаҿхоит.
Атуристә ретро-дәыӷба раԥхьаӡа акәны ари ахырхарҭа мҩала ибжьысит 2020 шықәсазы. Адәыӷба 10 вагонк рыла ишьақәгылоуп, 386-ҩык апассаџьырцәа рҭыԥ амоуп. Авагонқәа асовет аамҭа, 80-тәи ашықәсқәа ран ишыҟаз еиԥшны иҟаҵоуп, аныҳәамшқәа рзы ахәмаргақәа рыла иҩычоуп. Адәыӷба асовет аамҭа астилистика ала ишеиҿкааугьы, ҳаамҭа аҭахрақәа ирықәшәоит. Ақьафурҭа ахәыхкынҵа шьақәгылоуп аурыси аԥсуеи чысхкқәа рыла.