АҞӘА, хәажәкыра 18 - Sputnik. Азинеиҿкаара ахылаԥшра ацентр аадыртит Аҟәа Аҩнуҵҟатәи аусқәа русбарҭа амилициа актәи аҟәша аҷаԥшьаратә хәҭаҿы ҳәа аанацҳауеит Аԥсны ААР апресс-маҵзура.
Агәаҭарақәеи аҭакҟаҵареи ирызку апункт ҿыц аусушьа гәеиҭеит аминистр ихаҭыԥуаҩ Беслан Ҷкадуа.
Иара иазгәеиҭеит ахылаԥшратә центр аҵакыраҿы иахьыҟоу иабзоураны ианаамҭоу иаҭаху ашьаҿақәа рыдкылара алшоит, араион аҿы азинеилагарақәа ишахәҭоу рҿагылара алнаршоит ҳәа.
Апресс-маҵзураҿы адырра ҟарҵеит аҷаԥшьаратә хәҭаҿы ахәаахәҭратә ҩны "Рубин" ацхыраарала амониторқәа ишдыргылаз, аинтернет-проваидер "Система" алшара рынаҭеит ақалақь еиуеиԥшым ахәҭақәа рҟны игылоу авеб-камерқәа рҟынтәи атранслиациа.