АҞӘА, хәажәкыра 18 - Sputnik. Ареисқәа зеижә аанкылан Шәача жәларбжьаратәи аҳаиртә баӷәазаҿы анаҟә иахҟьаны, абри атәы аанацҳауеит аҳаирбаӷәаза асаит.
Асабша шәачатәи аҳаирбаӷәазаҿы анаҟә иахҟьаны 500-1000 метра рнаҩс акы абара ахьыуадаҩыз азы иаанкылан Санкт-Петербурги Москвеи ицоз ареисқәа, иара убас ареисқәа Екатеринбург, Сҭампыл, Белград, Казань, Баку, Нижни Новгород, Самара, Кемерово, Уфа, Челиабинск ицоз.
"Шәачатәи аҳаирбаӷәаза аусура аҳауа аҭагылазаашьа иахьыԥшуп. Асааҭ 10:00 рзы аҳаирпланқәа 14 рекипажқәа ажәҩан ахь ахалара мап ацәыркит", - ҳәа аарыцҳаит Шәачатәи аҳаирбаӷәаза апресс-маҵзураҿы.
Аҳаирбаӷәазаҿы аус ауеит аҳауа аҽеиҭакрақәа гәазҭо аоперативтә штаб, уи азы амаҵзурақәа русзуҩцәа рхыԥхьаӡара иацырҵеит.