АҞӘА, хәажәкыра 19 - Sputnik, Сариа Кәарацхьиаԥҳа. Акьанџьақәа ҟазҵо шәачатәи аҟаза Роман Соколовски аҟазаратә класс мҩаԥигеит Аҟәа Аҟазарақәа рышкол аҿы асабша, хәажәкыра 18 рзы.
Шәачатәи акьанџьаҟаҵаҩ, акьанџьақәа ртеатр "Саквоиаж" адиректор, асахьаркыратә напхгаҩы иԥыларазы инеит ахәыҷқәа рыдагьы адуцәагьы.
Соколовски аԥснытәи ахәаԥшцәа идирбеит атеатр "Саквоиаж" афырхацәа, идирҵеит акьанџьақәа рырхәмаршьа.
"Зегь бзианы имҩаԥысит, даара иаҳгәаԥхеит. Ахыбра оумашәа иԥшӡоуп. Ари ашкол 120 шықәса ахыҵуеит, даара сгәы иаахәоит ажәытә хыбрақәа абас иахьеиқәдырхо. Аҟазаратә-класс акәзар, ибзианы имҩаԥысит. Сара гәахәарыла ахәыҷқәа ирзеиҭасҳәеит акьанџьақәа ртеатр ҟазара хкык аҳасабала изакәу, ҳусушьа зеиԥшроу. Ахәыҷқәа иргәаԥхеит, азҵаарақәа сырҭон, зегь рхы аладырхәуан", - иҳәеит Роман Соколовски.
Аиԥылара аиҿкааҩ, апроект "Аԥснытәи аԥшаҳәа" Альбина Иаруллина иазгәалҭеит ари аҟазаратә класс ахәыҷқәа рыдагьы, адуцәагьы ишыргәаԥхаз.
"Зегь шьахәны имҩаԥысит, ахәаԥшцәагьы рацәаны иаҭааит, азҿлымҳара аадырԥшит. Ахәыҷқәа еилыркаартә зегь рзеиҭарҳәеит. Роман хәыҷи-дуи зегь иршанхеит", - лҳәеит Иаруллина.
Аусмҩаԥгатә еиҿкаан акультура-рккаратә проект "Аԥснытәи аԥшаҳәа" аҳәаақәа ирҭагӡаны.
"Аԥснытәи аԥшаҳәа" - акультура-арккаратә проектуп, хықәкысгьы иамоуп Аԥсны акультуратә ҭынха аӡыргара. Апроект аусура хацнаркит 2022 шықәсазы. Усҟан ацәыргақәҵақәа мҩаԥган Шәачеи Ростови.