АҞӘА, хәажәкыра 21 – Sputnik, Бадри Есиава. Аԥсны аҩбатәи ахада Сергеи Багаԥшь ихьӡ зху гагратәи абаҳча маҷ арԥшӡареи аиҿкаареи рзы аусурақәа ирылагеит, абри атәы Sputnik акорреспондент изеиҭеиҳәеит араион ахада актәи ихаҭыԥуаҩ Адамыр Ҵышәба.
"Абаҳча маҷ Абазгаа рымҩа араион маҷ иаҵанакуеит. Аусурақәа ирылагахьеит. Иԥсахуп 400, 350 миллиметра зыҭбаара ыҟоу, зоура 350 метра иҟоу аӡықәыӷәӷәаратә цәҳәақәа ҩба. Уи ашьҭахь абаҳча аиҿкааразы аплан шьақәыргылахоит", - иҳәеит иара.
Ҵышәба иажәақәа рыла, аԥсшьарҭа ҭыԥқәа алкаахоит, идыргылоит атәарҭақәа, алашарбагақәа.
Аԥсны аҩбатәи ахада Сергеи Багаԥшь ихьӡ зху абаҳча маҷ арԥшӡаразы Гагра араион абиуџьет аҟынтәи иазоужьхоит 29 миллион мааҭ.
Аусурақәа рхыркәшара аҿҳәара азгәаҭам, аха ашықәс нҵәаанӡа иалыршахоит, иазԥхьагәаҭам ҭагылазаашьақәак ҳԥырхагамхар иҳәеит Ҵышәба.