АҞӘА, хәажәкыра 26 – Sputnik. Фазиль Искандер ихьӡ зху аурыс драматә театр аспектакльқәа ҩба ддырбоит Гәыбаадәы, хәажәкыра 28 рзы, абри атәы Sputnik иазеиҭеиҳәеит атеатр анапхгаҩы Иракли Хынҭәба.
"Апроект "Аԥсуа ҿықә" анапхгаҩы Альбина Иаруллина ҳаззыԥшӡамыз ааԥхьара ҟалҵеит. Лара Аԥсны иадҳәалоу апроектқәа жәпакы налыгӡоит, реиҳарак акультура иадҳәалоуп. Лаԥшьгарала уажәы имҩаԥысуеит ҳсахьаҭыхыҩцәа Диана Хынҭәбеи Аԥшьа Ҳагбеи рцәыргақәҵа", - иҳәеит иара.
Гәыбаадәы РУСДРАМ иддырбоит амоноспектакльқәа ҩба: "Бродски" - Милана Ломиаԥҳа дызлахәу, Даур Занҭариа иповест "Енџьы-Ҳаным, зынасыԥ зцымныҟәаз" ала иқәыргылоу амоноспектакль- иналыгӡоит Анна Гиурегиан.
"Абарҭ аспектакльқәа рыҩба ҽнак идҳарбоит, хәажәкыра 28 рзы, абилеҭқәа ыҟаӡам. Гәахәарыла Гәыбаадәы ҳақәгылоит", - иҳәеит Хынҭәба.
Аспектакльқәа сааҭк роуп ирыбжьоу, арепетициақәа рзы рацәак аамҭа ыҟам, аха РУСДРАМ артистцәа аԥышәа рымоуп, рықәгылара қәҿиарала имҩаԥысуеит ҳәа агәра игоит Хынҭәба.