АҞӘА, хәажәкыра 28 – Sputnik, Бадри Есиава. Белоруссиа, Витебсктәи акикбоксерцәа ркоманда Цандрыԥшь аҳаблаҿы аҽазыҟаҵарақәа мҩаԥыргеит ҳәа Sputnik иазеиҭеиҳәеит акоманда азыҟаҵаҩ хада Валентин Клиушен.
"Сҩыза Данил Купцов иҳаиҭаз ааԥхьарала ҳааит. Цандрыԥшь даара иаҳгәаԥхеит. Аҭыԥантәи аклуб "Воин" азыҟаҵаҩ ашкол аҟынтәи аспортзал ҳаиҭеит аҽазыҟаҵарақәа рымҩаԥгаразы. Мышкахьы ҩынтә ҳҽазыҟаҳҵоит. Ашьыжь – ҳхала, ахәылбыҽха – шәыспортсменцәеи ҳареи", - ҳәа иҳәеит иара.
Белоруссиатәи акоманда 12-ҩык аспортсменцәа алахәуп, 12 - 17 шықәса зхыҵуа. Урҭ рыбжьара иҟоуп Белоруссиа ачемпионцәагьы.
Клиушен иажәақәа рыла жәамш рыҩнуҵҟа Аԥсны имҩаԥыргаз аҽазыҟаҵарақәа акыр хра рымоуп аспортсменцәа рзы. Аиҳаракгьы аинтерес рзаҵан аклуб "Воин" атаибоксиорцәа аспаррингқәа рыцымҩаԥгара.
"Ажәыларатә техника азхьаԥшра аҳҭон. Шәыспортсменцәа, аиҳаракгьы аӡӷабцәа, рҟазара ҳаракуп. Аԥсны акәымкәа Урыстәыла иқәгылозаргьы, аԥыжәаратә ҭыԥқәа ргартә иҟоуп", - иҳәеит азыҟаҵаҩ.
Белоруссиатәи акикбоксерцәа Цандрыԥшь аҽазыҟаҵарақәа мҩаԥыргеит
© Foto / Валентин Клюшен
Аԥсшьараамҭазы Риҵатәи амилаҭтә парк иаҭааны ирбеит.
"Ара аҳауаҭагылазаашьа ҳгәаԥхеит. Амш бзиан, Риҵа ҳаҭааит. Уа иаабаз ҳахнахит", - ҳәа иҳәеит Клиушен.
Белоруссиатәи акоманда хәажәкыра 20 рзы Аԥсныҟа иааит. Акикбоксинг азы Белоруссиа ачемпионат рҽазыҟарҵоит. Урҭ ҩаԥхьа ҭагалан Аԥсныҟа аара ргәы иҭоуп.