АҞӘА, мшаԥы 1 - Sputnik. Аԥсны акамшьиакра аҿҳәара инахар ауеит ҳәа арадио Sputnik аефир аҿы иҳәеит Аекологиазы аҳәынҭқарратә еилакы ахантәаҩы Савели Ҷыҭанаа.
Аԥсыӡ бзианы иааиуа иалагеит аҵыхәтәантәи амшқәа рзы, убри азы, Ҷыҭанаа иажәақәа рыла, Ақыҭанхамҩа аминистрра аекологцәа рахь аҳәара ҟарҵеит аԥсыӡкраамҭа инахарц.
“Аԥсыӡкраамҭа ахыркәшарахь инеиуеит, аха изласаҳауа ала, аҩыржәоуп аԥсыӡ андәықшла, убри азы Ақыҭанхамҩа аминистрра аҳәара ҟанаҵоит аԥсыӡкра аҿҳәара ҳнахарц. Макьана ҳара аҭагылазаашьа ҳахәаԥшуеит, ииашаҵәҟьаны ус иҟазар, азин раҳҭар ҟалап", - иҳәеит атәыла аеколог хада.
Аԥсыӡкраамҭа зегьы иалагӡаны, аӡынра иахьԥхараз иахҟьаны, акамшьиа маҷны иааиуан. Аԥсны аӡқәа рҟны зыкра азин ыҟаз 35 нызқь тонна раасҭа хәынтә еиҵаны иркит - 6,5 нызқь тонна.
Савели Ҷыҭанаа иажәақәа рыла, аԥснытәи аекологцәа урыстәылатәи рколлегацәа рыцырхырааны иҭырҵаароуп аԥсыӡ маҷны ааира зыхҟьаз.
Аԥсны аԥшаҳәаҿы есышықәса ирклоит 30-50 нызқь тонна акамшьиа.
Акамшьиакра аамҭа Аԥсны иалагоит ԥхынҷкәын алагамҭазы, инҵәоит хәажәкыра анҵәамҭазы.