АҞӘА, мшаԥы 1 - Sputnik, Асмаҭ Ҵәыџьԥҳа. Аҟәа имҩаԥысит Аԥсны Амилаҭтә шьапылампылтә лига ачемпионат актәи амш.
Аҳҭнықалақь астадион "Динамо" аҿы имҩаԥысит ҩ-хәмаррак: "Аӡҩыбжьа" - "Ҷлоу", "Лыхны" - "Аԥсны-2". Даҽа хәмаррак - "Џьгьарда" - "Ешыра" мҩаԥысит астадион "Учхоз" аҿы.
Ахәмаррақәа рылҵшәақәа рыла, "Ешыра" "Џьгьарда" иаиааит 2:5 ҳәа, аӡҩыбжьаа ҷлоуаа ирыҵахеит 1:4 ҳәа, "Лыхны" - "Аԥсны-2" рыхәмарра еиҭахарала ихыркәшахеит 2:2 ҳәа.
Аԥсны Амилаҭтә шьапылампылтә лига - ақыҭа командақәа рыла ишьақәгылоу ачемпионат ауп. Уи иалахәуп 13 команда Аԥсны ахы-аҵыхәаҟынтәи, акоманда қәыԥш, 14-17 шықәса зхыҵуа Аԥсны ачемпионат иалахәыз арԥарцәа злоу "Аԥсны-2"-гьы рылаҵаны.
Ачемпионат хә-турк рыла ишьақәгылоуп, амза нҵәаанӡа имҩаԥыслоит. Актәи атур уаҵәы ихыркәшахоит - астадион "Учхоз" аҿы асааҭ 12:00 рзы ихәмаруеит "Кәтол" - "Уарча", асааҭ 14:00 рзы - "Џьырхәа" - "Баслаҭа", асааҭ 16:00 рзы - "Пицунда" - "Бзыԥ".
Ачемпионат аҿы иаиааиуа акоманда иааиуа асезон азы аиԥылара мҩаԥнагоит 2023 шықәсазтәи асезон аан аҵыхәтәантәи аҭыԥ згаз акомандеи иареи, урҭ рахьтә иаиааиуа иреиҳау алигахь анеира алшоит.