АҞӘА, мшаԥы 3 - Sputnik. Гагратәи асанитар-епидемиологиатә маҵзура ахыбра абактериологиатә ПЦР- лабораториа ахьыҟоу актәи аихагылаҟны аиҭашьақәыргылартә усурақәа хыркәшоуп, абри атәы аанацҳауеит Гагра ТВ.
Арҭ аусурақәа ирықәхарџьын 6,6 миллион мааҭ. Мшаԥымза аҽеиҩшамҭазы алабораториа аусура хацыркхоит. Иахьазы амаругақәеи аҩнымаҭәеи аагара иазыԥшуп.
Ахыбра шьаҭанкыла аиҭашьақәыргыларазы Гагратәи араион анапхгара иазоунажьит 20 милл мааҭ.
Арҽеиратә усурақәа хәҭа-хәҭала имҩаԥысуеит, анаҩс иазгәаҭоуп ахыбра аҩбатәи аихагылеи аҿаԥшылареи реиҭашьақәыргылара.
Гагра арион асанитар ҳақьым хада Емина Иазычба лажәақәа рыла, ахыбра аиҿкаара амаҵзура аусура акырӡа еиӷьнатәуеит, ирыдыргало амаҵзурақәа еиҳартәуеит. Иазгәаҭоуп, ацхыраара шрырҭало ауааԥсыра реиԥш аҳәынҭусбарҭақәеи акоммерциатә маҵзурақәеи.