ЛЫХНЫ, мшаԥы 7– Sputnik, Бадри Есиава. Аԥсны ахада Аслан Бжьаниа Лыхнашҭа даҭааит, уаҟа еилкаам аӡәы мшаԥы 5 рзы аҭәаҵла хьархьла иԥиҟеит.
Аекологцәа аҵла аиқәырхаразы иҟоу алшарақәа еиҭарҳәеит.
Аԥсны аекологиа аинститут аиҳабы Роман Дбар иажәақәа рыла, аҵла аҩнуҵҟа гәаҩоуп, аҭәаҵла ацәа акәын еибаркны изкыз, уи ԥҟоуп. Уажәазы аҵла арӷәӷәаразы агәаҩара абетон ҭадырҭәоит.
Дбар ажәалагала ҟаиҵеит атәылаҟны иҟоу иреиӷьӡоу аихаҳаҩцәа фҩык раҟара еизыргарц, урҭ аҵла агәыцә аҟны аихаҳатәқәа ҟарҵарц. Уи аҭахәуп аҵла ихырҳагоу амаҭәашьарқәа аиурц. Ас еиԥш иҟоу аихаҳатәқәа 5-5 см рыбжьаҵаны иаларгылатәуп. Зынӡа 15- цыра рҟынӡа аҭаххоит.
Иара убас аеколог иҳәеит, аҵла аидара ақәхразы иҩҩоу амахәқәа хдырҿҿарц.
Атәыла ахада ицны Лыхнашҭа инеит уи ихаҭыԥуаҩ Бадра Гәынба, аԥыза-министр Александр Анқәаб, Атәыла анапхгара рхаҭарнакцәа.