АҞӘА, мшаԥы 10 – Sputnik. Урыстәылатәи Афедерациа аҳазалхратә маҵзура аинформациатә система аусура еиԥҟьеит, абри атәы аанацҳауеит аусбарҭа апресс-маҵзура.
"Иахьа асааҭ 6:00 рзы аҳазылхратә усбарҭақәа ринформациатә система аиԥҟьара азгәаҭоуп, аҳазылхратә усмҩаԥгатәқәа акыр џьара аиҵахара роуит. Заанаҵтәи адыррақәа рыла, иҟоу ауадаҩрақәа ахҟьоит Урыстәылатәи Афедерациа аҳазалхратә маҵзура ИТ-маҵзура иаиуз анҭыҵтәи анырра", - ҳәа аҳәоит аҳәамҭаҿы.
Аусбарҭаҿ иазгәарҭоит, иҟалаз ауадаҩрақәа раԥырҟәҟәааразы аҟазацәа аусурақәа шымҩаԥырго. Ауадаҩрақәа раԥыхра шаҟа аамҭа иадхало атәы ҳәаӡам.
Ауадаҩрақәа азгәаҭоуп аушьҭырҭа Ԥсоу аҟынгьы. Урыстәыла аҳәаа иахрыжьуамызт аԥсуа номерқәа ззақәгылаз амашьынақәагьы.