АҞӘА, мшаԥы 10 – Sputnik. Аҳазалхырҭа аинформациатә система аусура аиԥҟьара азгәаҭоуп аԥсуа-аурыс ҳәаа ада, Урыстәыла егьыҭ аҳәаақәа зегьы рҟны, абри атәы аанацҳауеит Аԥсны аҳазалхратә еилакы.
Аурыс аномерқәа змоу амашьынарныҟәцаҩцәа роуп изылшо аҳәаа ахысра. Аамҭалатәи аусурала урыстәылатәи аҳәынҭномерқәа зқәу аидырмҩангагатә машьынақәа ашәҟәы рҭагалара рҽазыршәоит.
Агәаранқәа ҟамларц ААЕ адәныҟаекономикатә ус иадҳәалоу адырра рырҭоит, аинформсистема аусура иалагаанӡа Аԥснынтәи Урыстәылаҟа аалыҵ ахыгара залыршахом.
Мшаԥы 10, ашьыжь асааҭ 6 рзы аушьҭырҭа-гәаҭырҭатә ҭыԥ Адлер аусура еиԥҟьеит Урыстәыла аҳазалхратә усбарҭақәа ринформациатә система акибержәылара иахҟьаны.
Асистема анышьақәыргылахо макьаназы еилкаам. Ауадаҩрақәеи азҵаарақәеи рзы иҷыдоу аҭел ахь асра рабжьыргоит аҳазалхыҩцәа.