АҞӘА, мшаԥы 12 - Sputnik. Аҟәатәи аҳаирбаӷәазаҿы аҳаиртә аушьҭырҭатә ҭыԥ апроектҟаҵара иалацәажәеит Аминистрцәа реилазаара аилатәараҟны.
Аҳаирбаӷәаза актәи аихагылаҟны иазгәаҭоуп Аԥсны аҳәынҭқарратә ҳәаа аушьҭырҭатә ҭыԥ аҿы иарбоу ахылаԥшратә маҵзурақәа русура аиҿкаара.
Аилацәажәара иалахәын Аԥсны АШәМ аҳәаахьчаратә отриади, Аҳәынҭқарратә ҳазалхратә еилаки, Аимадареи, амассатә коммуникациақәеи, ацифратә ҿиареи рзы аилаки, Аҳәынҭстандарти, Акарантинтәи Аветеринартәи амаҵзурақәа рхаҭарнакцәа.
Ирылацәажәеит ари аус азы атехникатә ҭахрақәа. Аԥсни Урыстәылеи рыбжьара аҳаиртә еимадара аартра азгәаҭоуп 2025 шықәсазы.
Еиҭашьақәыргылахо аҳаирбаӷәаза сааҭк аҩнуҵҟа 400-ҩык мамзаргьы шықәсык аҩнуҵҟа х-миллионҩык инареиҳаны апассаџьырцәа аднакылар алшоит.