АҞӘА, мшаԥы 12 – Sputnik. Асаит ԥаршеиқәа рхыԥхьаӡара арацәахара адҳәалоуп аҵыхәтәантәи аамҭақәа рзы Аԥсны аԥсшьара алызхуа рхыԥхьаӡара ахьеизҳауа ҳәа арадио Sputnik иазеиҭалҳәеит аминистрра аинформациатә мҩаԥгареи ахыԥшатә политикеи рыҟәша аиҳабы Оксана Табаӷәуаԥҳа.
"Ирацәоуп ахҭысқәа, атуристцәа аофициалтә хыҵхырҭа – Атуризм аминистрра аинформациеи дара ирымоу аинформациеи анеиҿыдмырԥшуа. Аусбарҭа аофициалтә саит аҿы иарбоуп аԥсшьаҩцәа здызкыло аобиектқәа рышәҟәынҵа, аҭелқәа, аелектронтә ҭыӡҭақәа", - лҳәеит лара.
Атурист ари ашәҟәынҵаҿы аобиект имбазар, ацәаҳәа ҷыда: 8 (800) 5054240 ахь аҭел дасыр ҟалоит, аинформациа аиуразы.
"Аобиект азы аинформациа ианаҳәо, ҳара атурист изку адыррақәеи аԥсшьаразы аҭыԥ анҿеиҵази ашәҟәы ианаҳҵоит, анаҩс аобиект ахь аҭел ҳасны аинформациа ҳаҳәоит, игәаҳҭоит. Аҭыԥ ааныркылеит ҳәа ишьақәырӷәӷәамзар, атурист иҳардыруеит асаит ԥаршеи дшақәшәаз", - ҳәа еиҭалҳәеит лара.
Анаҩс аусбарҭа иинформациа аланарҵәоит ари асаит шԥаршеи-саиту, амаҵзурақәагьы шымҩаԥнамго. Аминистрра аотелиерцәа рахь ааԥхьара ҟанаҵоит ртуробиектқәа рзы аинформациа азынарышьҭларц, урҭ аобиектқәа аминистрра ашәҟәынҵа аҭагаларазы.