АҞӘА, мшаԥы 16 - Sputnik. Аԥсны ареспублика Очамчыратәи араиони Удмуртиатәи ареспублика Алнаштәи араиони акультуреи, атуризми, аҵареи, аспорти, ақыҭанхамҩеи аусхкқәа рҟны аусеицуразы аиқәшаҳаҭра рнапы аҵарҩит.
Аделегациа ахантәаҩыс дыҟоуп Алнаштәи араион ахада Алексеи Семионов, анаплакыҩцәа реилазаара ахантәаҩы актәи ихаҭыԥуаҩ, иара убас Удмуртиа аусураҭаҩцәа рассоциациа ахантәаҩы Григори Стрелков.
Аганқәа иазгәарҭеит аҩрегионк русеицуреи аиҩызаратә еизыҟазаашьа ааигәақәеи рыбжьаҵара аҵак ду шамоу.
Удмуртиа аделегациа Аԥсны иахьынӡаҟоу хымш ирылагӡаны Очамчыра араион атуристтәи ақыҭанхамҩатәи лшара ҭырҵаауеит.