АҞӘА, лаҵара 7 - Sputnik. Боливариантәи Ареспублика Венесуела иҟоу Аԥсны Аҳәынҭқарра ацҳаражәҳәаҩ Заур Ӷәаџьаа далахәын Аиааира ду 78 шықәса ахыҵразы Каракас имҩаԥгаз аныҳәа. Абри атәы аанацҳауеит Аԥсны ААР.
Пасео де Лос Просерес ашҭаҟны "Псра зқәым архәҭа" аныҟәара мҩаԥган, аԥсуа цҳаражәҳәарҭа аусзуҩцәа рнапаҟны иркын афашизм иаҿагыланы еибашьуаз ҳтәылауаа рфотосахьақәа.
Афырхацәа рбаҟаҿаԥхьа ашәҭшьыҵәрақәа шьҭарҵеит, уи аамҭазы Аԥсни, Урыстәылеи, Беларуси агимн адырҳәон.