АҞӘА, лаҵара 10 - Sputnik. Урыстәылатәи аҳазалхыҩцәа Аԥснынтәи Урыстәылаҟа изакәанымкәа аҭаҭын аалыҵ алагалара аԥдырҟәҟәааит, абри атәы аанацҳауеит Шәача ақалақь аҿы аус зуа Краснодартәи аҳазалхра.
Ахаҵа игәҭакын урыстәылатәи акцизтә маркақәа зқәымыз, иҷыдоу амаркировка змамыз "CHAPMAN" захьӡу 300 ҭоԥ (6000 цыра) асигареҭ ралагалара.
Аҳазалхыҩцәа автомашьына ВАЗ 2106 аимдараан аԥхьатәи ашәқәа рыбжьареи атәарҭақәа рыҩнуҵҟеи ирбеит аконтрабанда.
Азинеилагаҩ ишиҳәаз ала, асигареҭқәа аҭиразакәын изигоз, Урыстәылаҟа аҭаҭын аалыҵ алагаларазы иҟоу аԥкрақәа ртәы идыруан, убри азоуп аҳазалхыҩцәа ирцәыҵәахны ибжьигарц дзаҿыз.