ААУ аҟны имҩаԥысит атуризми асасааирҭатә уси рыспециалистцәа разыҟаҵара ацентр аҿы аҵара хзыркәшаз аекскурсиамҩаԥгаҩцәа аршаҳаҭгақәа ранашьара. Сынтәа аттестациа иахысны, акурсқәа хдыркәшеит ҳәа иԥхьаӡоуп 64-ҩык. Ари ашьҭахь дара ирзыԥшуп даҽа етапкгьы - атуризм аминистрраҟны аекскурсиамҩаԥгаҩ иквалификациа аиура.
Аханатә акурсқәа рхысразы 80-ҩык арзаҳалқәа аларҵеит, аха аԥышәарақәа рҟынӡа инаӡеит 64-ҩык.
"Ацентр аусура шьақәгылоуп атеориатәи апрактикатәи хәҭақәа рыла. Аԥышәарақәа рҟынӡа инеиз зегьы иарҭеит. Ахәыҷқәа уаҳа наҭахымкәа рхы аадырԥшит, аусуразы алшара рымоуп. Есышықәса иаҳа-иаҳа иҳарџьбароит апрограмма, избанзар ирацәахеит атәым милаҭқәа аекскурсиа знапы алазкыр зҭаху. Акурсқа ирхысуа имазароуп Аԥсны атәылауаҩшәҟәы. Атәым милаҭ идкылара азин ҳамам, аха ирацәаҩуп ус еиԥш изҭаху", - ҳәа еиҭалҳәеит Зарандиаԥҳа.
Аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.