Аԥсны агәабзиарахьчара аминистр Едуард Быҭәба амедусҳәарҭақәа рнапхгаҩцәа алархәны имҩаԥигаз аилатәараҟны иҭиҵааит акурорттә сезон ахәышәтәырҭақәа ахьынӡазыҟаҵоу. Аҳақьымцәа еиҭарҳәеит хәшәыла аиқәыршәара ауси, ашьҭаҵарҭатә ҭыԥқәа рыла аиқәыршәареи, акадртә зҵаарақәеи уҳәа ртәы. Ахәыҷтәы республикатә хәышәтәырҭа аҳақьым хада Инесса Камлиаԥҳа арадио Sputnik аефир аҿы еиҭалҳәеит рҭагылазаашьа зеиԥшроу.
Ахәыҷтәы хәышәтәырҭа раԥхьа иргыланы даҭахуп анестезиолог-ареаниматолог, иҳамоу аӡәызаҵәык иоуп ҳәа азгәалҭеит аиҿцәажәараҿы Камлиаԥҳа. Иара уи адагьы иҳазгаӡом ахирургцәа, УЗИ аспециалист, иааидкылан иҳамам акадрқәа рацәоуп лҳәеит лара.
"Аԥхынтәи аамҭазы ачымазаҩцәа рхыԥхьаӡара иацлоит, избанзар ҳтәыла иаҭаауа рацәахоит. Урыстәылатәи ҳколлегацәа ҵыԥхгьы иааԥхьан, уи даара иҳахәоит, иҳацхраауеит, аха иаҳҭахуп еснагь аус зуло. Ауаа аҭыԥан ҳрыхәаларц, аҳәаа иахыҵны ацара рықәымшәаларцаз", – лҳәеит аҳақьым.
Камлиаԥҳа еиҭалҳәеит ҵыԥх аԥхын аамҭазы рҭагылазаашьа зеиԥшраз, хәшәыла реиқәыршәара аус шеиҿкаау.
Иаҳа инарҭбааны аиҿцәажәара шәазыӡырҩыр шәылшоит арадио Sputnik Аԥсны аефир аҿы, мамзаргьы аудиофаил аҿы.