ԤСОУ, рашәара 9 – Sputnik, Бадри Есиава. Урыстәыла аԥыза-министр ихаҭыԥуаҩ Александр Новак Аԥсныҟа аусутә еилацәажәарақәа рзы дааит ҳәа адырра ҟаиҵеит Sputnik акорреспондент.
Асасцәа аурыс-аԥсуа ҳәааҿы ирԥылеит Аԥсны ахада ихаҭыԥуаҩ Бадра Гәынба, Аԥсны иҟоу Урыстәыла аҷыдалкаатәи азинмчы змоуи ацҳаражәҳәаҩ Михаил Шургалин, аԥыза-министр, аекономика аминистр Кристина Озган, ахада Иусбарҭа анапхгаҩы Џьансыхә Нанба, Гагра араион ахада Иури Хагәышь.
Урыстәылатәи аделегациа иалоуп Арегионқәеи аҳәаанырцәтә тәылақәеи рыбжьара акультуратә еимадарақәа рзы Урыстәыла ахада иҿы иҟоу Аусбарҭа аиҳабы, аекономикатә ҿиара аминистр ихаҭыԥуаҩ Дмитри Вольвач, аенергетика аминистр ихаҭыԥуаҩ Евгени Грабчак, Арра-техникатә усеицуразы Афедералтә маҵзура аиҳабы ихаҭыԥуаҩ Михаил Бабич.
Асасцәа аҭаауеит Гагра амшынаҿықәаҿтәи апарк, "Акурорт Пицунда", Аҟәатәи аҳаирбаӷәаза, иара убас Аԥсны ахада Аслан Бжьаниа идикылараны дыҟоуп.