АҞӘА, ԥхынгәы 4 – Sputnik. Леон Минџьиа иганахьала ашьаус алкаақәа ҟаҵаны аӡбарҭахь инашьҭуп ҳәа аанацҳауеит Аԥсны ААР апресс-маҵзура.
Минџьиа аԥаршеи ус мҩаԥигеит ҳәа агәызҩара ыҟоуп (АА АЗ ахәҭаҷ 156 ахәҭа 4, ахәҭаҷ 29 ахәҭа 3). Азакәанԥҵара инақәыршәаны иара 6-12 шықәса аҭакра иқәшәар ҟалоит, имазарагьы имхны.
Очамчыра араион Гәыԥ ақыҭа ауаҩԥсы Леон Минџьиа аусҭҵааратә експеремент амҩаԥгараан аҟәатәи акаҳуажәырҭаҿы даанкылан 2023 шықәса жәабран 28 рзы.
Ауаажәларратә еиҿкаара "Ассоциация силовых структур Абхазии" ахантәаҩы Минџьиа имчра ихы иархәаны Урыстәыла атәылауаҩ Геворк Сунгуртиан 300 000 мааҭ ҳәа Аԥсны атәылауаҩшәҟәы узыҟасҵоит ҳәа иаҳәаны аванс ҳасабла 150 000 мааҭ имихит. Аԥарақәа аниоуаз аамҭазы иара дааныркылеит.